Gwiriwch fod gennych bopeth sydd ei angen arnoch

Bydd angen:

• eich cyfeirnod Dywedwch Wrthym Unwaith
• enw a dyddiad marwolaeth y person a fu farw
• enw a chyfeiriad yr ysbyty, y cartref gofal neu'r hosbis os gwnaethant farw yno
• Rhif Yswiriant Gwladol neu ddyddiad geni'r priod sy'n goroesi
• manylion y perthynas agosaf
• manylion yr unigolyn neu'r cwmni sy'n delio â'r ystâd (eiddo, meddiannau ac arian)

Mae hefyd yn help os gallwch ddarparu rhif Yswiriant Gwladol y person sydd wedi marw. Mae'n ei gwneud hi'n haws ac yn gyflymach i sefydliadau eu paru â’u cofnodion.

Yn dibynnu ar bwy rydych am ei hysbysu, efallai y bydd angen arnoch:

• eu rhif pasbort a'u tref enedigol (i ganslo pasbort Prydeinig)
• rhif eu trwydded yrru (i ganslo trwydded)
• rhifau cofrestru cerbyd unrhyw gerbydau yr oeddent yn berchen arnynt i dynnu eu henw fel y ceidwad cofrestredig a chanslo treth y cerbyd (bydd angen trethu'r cerbyd eto ar unwaith cyn cael ei ddefnyddio)
• enw eu cyngor lleol a pha wasanaethau yr oeddent yn eu cael, fel Budd-dal Tai neu ostyngiad Treth Gyngor
• eu rhif Bathodyn Glas (dewisol) i ganslo Bathodyn Glas
• i wybod a oeddent yn cael budd-daliadau, credydau treth neu Bensiwn y Wladwriaeth
• i wybod a oeddent yn cael arian o Bensiwn y Lluoedd Arfog neu Gynllun Iawndal

Hysbysu pensiwn y sector cyhoeddus

Bydd angen i chi ddarparu rhif Yswiriant Gwladol y person a fu farw, os oedd yn cael arian neu’n talu i mewn i’r cynlluniau canlynol:

• Cynllun Pensiwn y Gwasanaeth Sifil
• Pensiynau’r GIG ar gyfer staff y GIG yng Nghymru a Lloegr
• Asiantaeth Pensiynau Cyhoeddus yr Alban ar gyfer staff y GIG, athrawon, yr heddlu a diffoddwyr tân yn yr Alban
• Cronfa Diogelu Pensiynau a/neu Gynllun Cymorth Ariannol
• Cynlluniau Pensiwn Llywodraeth Leol (CPLlL)

Mae eu rhif Yswiriant Gwladol ar eu cerdyn Yswiriant Gwladol, slip cyflog neu P60. Os oeddent yn cael Pensiwn y Wladwriaeth neu fudd-daliadau, gall fod ar lythyr budd-dal neu gyfriflen banc.